Pepsi moda dünyasına manikürə zərər verməyən üzüklə addım atıb
Pepsi konservləşdirilmiş içkilərin açılması zamanı zədələnən manikürlərə biganə qalmayıb və konservləşdirilmiş içkilərin açılmasına imkan verən üzük istehsal edib.
Pepsi estetik və funksionallığı birləşdirən yeni məhsulunu təqdim etdi. İspaniyada istehsal olunan “Pepsi Ring” içki qutularını açarkən manikürünü qorumaq istəyənlər üçün nəzərdə tutulub. İçərisində xüsusi konserv açma mexanizmi olan üzük dırnaqların qırılmasının qarşısını almaq məqsədi daşıyır.
925 əyar gümüşdən hazırlanmış və ağ sirkon daşlarla bəzədilmiş bu üzük Long Play Jewels, Lúcid dizayn studiyası və PS21 kreativ agentliyi ilə əməkdaşlıqda hazırlanıb. Üzüyün altındakı gizli açar istifadəçiyə qutunun qapağını asanlıqla qaldırmağa imkan verir.
Məhsul ideyası ispan müğənni Bad Gyalın içki qutusunu açarkən dırnaqının sınması ilə bağlı sosial şəbəkədə paylaşımından sonra yaranıb. Bu paylaşımın yaratdığı rezonans Pepsi-ni həm estetik, həm də faydalı bir həll hazırlamağa təşviq etdi. Bad Gyal üçün sarı qızıl və brilyantdan hazırlanmış xüsusi versiya da hazırlanmışdır.
Məhdud buraxılış Pepsi Ring həm qadınlara, həm də kişilərə müxtəlif ölçü seçimləri ilə müraciət edir. Məhsula sahib olmaq istəyənlər Pepsi-nin rəsmi kanalları vasitəsilə qeydiyyatdan keçə bilərlər.
